السلام عليكم
اليوم طيبت البابوش وبغيت نوريكم طريقتي في تحضيره حيث واحد النهار كليتو من عند واحد السيد في مدينة فاس العتيقة وعجبني بزاااف وسولتو على الطريقة وعطاني المقادير ديالها الله يجازيه بالخير
اولا بعد قبل من نبداو في البابونش بغيت نبين لبعض الناس لي كيضنو ان اكل البابوش حرام بل بالعكس هو بحالو بحال اكل الجراد وقلبت في الانترنت ولقيت انه(( حلال اكله والذليل ان ليس له دم وحكمه حكم الجراد ))
اولا حاجة ملي نجيبو الحلزون للدار نحطوه في سطل او بانيو ونغسلوه مزيااان مزيااان ونصيفوه من الماء ونحطوه في بانيو و نديرو معاه النخالة ونغطيوه بشي غطا يكون متقب بحال شي شبكو كبيرة باش يتنفس مزيان
ولغد ليه نعاودو نفس الطريقة لمذة 3 ايام
الناهر الرابع نحاول نهز من البانيو غير الحلزون لي عايش وكيتحرك ونغسلو مرة اخرى ونصفيه مزيان وندير معاه الاعشاب بحال الزعتر ازير فليو النعناع المهم الحاجة لي تكون عندك بكثرة ديريها
ولغد ليه نعاودو نفس الشيئ لمدة 3 ايام
اليوم السابع كنهزو غير الحلزون لي عايش وكيتحرك مزيان ونغسلوه مزيان مزيان مزيان حتا يصفى
في هذه المرحلة غادي نكونو تحصلنا على حلزون نقي من برا وحتا من الداخل
حيث النخلة لي كنعطيوه 3 ايام الاولى كتنقيلو كرشو مزيان من التراب والحجيرات الصغار والوسخ
والاعشاب وبالاخص الزعتر كيعقمو مزيان وكيحيد جميع المكروبات لي يقدر يكون هاز في مصارنو وفوق هادشي كينسمو مزيان
كنحطو الطنجرة ديالنا وديرو فيها الما ونخليوها تغلي مزياااان
ونبقاو نحطو الحلزون فيها واحنا كنقولو(( بسم الله ))
من بعد الحلزون كيطلق واحد الرغوة ديالو نبقاو نحيدوها شوية بشوية
كنوجدو الكموسة ديالنا لي غادي يكونو فيها الاعشاب ليغادي يطيب بيهم الحلزون
انا درت فيها \ الزعتر \ عرق سوس غير شوية \ خودنجال \السكنجبير \اوراق سيدنا موسة \ حبيبات ديال الكمون \حبيبات ديال لبزار \ قشور اليمون \ قشور الحامض\ شوية قشور الرمان\ فلفل حار \أزير \شوية كروية \ القرفة اعواد \ النعناع ( المهم ديري شوية شوية من الحاجة انا كثرة شوية من الزعتر حيث كيعجبني المذاق ديالو )
كنحطوها في الطنجرة ونزيدو الملح حسب الذوق ونخليو الحلزون يطيب مزيان وعلى خاطرو
غادي تعريف طاب ملي تبقاي تخرجي لحمة الحلزون من القوقعة بسهولة
المهم هو كاياخد من ساعة ونصف حتا لساعتين
وها انتم جربوه ومغاديش تندمو
وبصحة والراحة.
المصدر: منتدى أناقة المغربي
الإبتساماتإخفاء